લગ્નની સીઝન પહેલા જ સોના-ચાંદીના ભાવે જોર પકડ્યું છે. આજે મંગળવારે સોનાની કિંમતમાં વધારો જોવા મળી રહ્યો છે ત્યારે ચાંદીના ભાવમાં પણ જોરદાર ઉછાળો જોવા મળી રહ્યો છે. મલ્ટી કોમોડિટી એક્સચેન્જ (MCX) પર આજે સોનું 409 રૂપિયા મોંઘુ થયું છે. MCX પર આજે સવારે બજાર ખૂલે ત્યારે સોનું 52588.00 રૂપિયા પર ટ્રેડ કરી રહ્યું છે જ્યારે ચાંદી 1011.0 રૂપિયાના વધારા સાથે 68305.00 પર ટ્રેડ કરી રહી છે. તમને જણાવી દઈએ કે ગત સપ્તાહથી સોના અને ચાંદીના ભાવમાં વધારો જોવા મળી રહ્યો છે.
બુલિયન માર્કેટની શું છે સ્થિતિ ?
બુલિયન માર્કેટમાં પણ આજે સોના-ચાંદીના ભાવમાં વધારો જોવા મળી રહ્યો છે. આજે 22 કેરેટ સોનાની કિંમત 48868 રૂપિયા પર ટ્રેડ થઈ રહી છે, જ્યારે 24 કેરેટ સોનાની કિંમત 53310 રૂપિયા પર ટ્રેડ થઈ રહી છે. અહીં 20 કેરેટ સોનાની સરેરાશ કિંમત 44425 રૂપિયા અને 18 કેરેટ સોનાની કિંમત 39983 રૂપિયા પર ટ્રેડ થઈ રહી છે. તે જ સમયે, 16 કેરેટ સોનાનો ભાવ 35540 રૂપિયા પર પહોંચી ગયો છે.
સોનાની આયાત વધી
દેશમાં વધતી મોંઘવારી વચ્ચે લોકોનો સોના પ્રત્યેનો ક્રેઝ વધી રહ્યો છે. દેશની સોનાની આયાત 2021-22ના પ્રથમ 11 મહિનામાં (એપ્રિલ-ફેબ્રુઆરી)માં 73 ટકા વધીને $45.1 બિલિયન થઈ ગઈ છે. માંગ વધવાને કારણે સોનાની આયાત વધી છે. ગયા નાણાકીય વર્ષના સમાન સમયગાળામાં સોનાની આયાતનો આંકડો $26.11 બિલિયન હતો.
તમે આ રીતે સોનાના રેટ ચકાસી શકો છો
સમગ્ર દેશમાં સોનાના દાગીનાની કિંમત અલગ અલગ હોય છે, કારણ કે તેમાં એક્સાઈઝ ડ્યુટી, રાજ્ય કર અને મેકિંગ ચાર્જનો હિસ્સો પણ હોય છે. તમારા શહેરમાં સોનાની કિંમત તપાસવા માટે તમે ઈન્ડિયન બુલિયન એન્ડ જ્વેલર્સ એસોસિએશન (IBJA) ની મદદ લઈ શકો છો. આ માટે તમારે ફક્ત 8955664433 નંબર પર મિસ્ડ કોલ આપવાનો રહેશે. તમારા મોબાઈલ નંબર પર સોનાના લેટેસ્ટ રેટનો મેસેજ આવશે.