કેવી રીતે ઘટશે પેટ્રોલ અને ડીઝલના ભાવ? પેટ્રોલિયમ રાજ્ય મંત્રીએ સંપૂર્ણ યોજના જણાવી

કેન્દ્ર સરકાર પેટ્રોલ અને ડીઝલની સતત વધી રહેલી કિંમતોને ઘટાડવા માટે સતત પ્રયાસો કરી રહી છે. આ સંદર્ભે, સરકાર છેલ્લા ઘણા સમયથી ઇથેનોલના મિશ્રણ પર ભાર આપી રહી છે. સૂત્રોનું એમ પણ કહેવું છે કે 1 એપ્રિલ, 2023થી પસંદગીના પેટ્રોલ પંપ પર 20% ઇથેનોલ બ્લેન્ડિંગ સાથે પેટ્રોલ-ડીઝલ ઉપલબ્ધ થશે. તેનાથી તેલના ભાવમાં ઘટાડો થશે.

તેલ માટે આંતરરાષ્ટ્રીય બજાર પર નિર્ભરતા

કેન્દ્રીય પેટ્રોલિયમ રાજ્ય મંત્રી રામેશ્વર તેલીએ જણાવ્યું હતું કે ભારત મોટાભાગે પેટ્રોલ-ડીઝલ માટે આંતરરાષ્ટ્રીય બજાર પર નિર્ભર છે. તેમણે કહ્યું કે, જ્યાં સુધી સ્થાનિક ઉત્પાદનમાં વધારો નહીં થાય ત્યાં સુધી તેલની કિંમતોને નિયંત્રિત કરી શકાતી નથી.

83 ટકા તેલ આપણે બહારથી લાવીએ છીએ

રાજીવ ગાંધી ઇન્સ્ટિટ્યૂટ ઑફ પેટ્રોલિયમ ટેક્નોલોજી, જૈસ, અમેઠીમાં કૌશલ્ય વિકાસ કેન્દ્રના ઉદ્ઘાટન પ્રસંગે બોલતા, તેલીએ કહ્યું, “ દેશમાં 83 ટકા તેલ બહારથી લાવીએ છીએ. આપણે આંતરરાષ્ટ્રીય બજાર પર નિર્ભર છીએ. જ્યાં સુધી આપણું ઉત્પાદન નહીં વધે ત્યાં સુધી તેલની કિંમતો પર અંકુશ નહીં આવી શકે.

સરકાર નિર્ભરતા ઘટાડવા માટે કામ કરી રહી

તેમણે કહ્યું કે જ્યારે પણ આંતરરાષ્ટ્રીય બજારમાં તેલની કિંમત વધે છે ત્યારે પેટ્રોલિયમ કંપનીઓ તેલની કિંમતમાં વધારો કરે છે. આંતરરાષ્ટ્રીય બજાર પર નિર્ભરતા ઘટાડવા સરકાર આ દિશામાં કામ કરી રહી છે. ઈલેક્ટ્રિક વાહનોને પ્રોત્સાહન આપવામાં આવી રહ્યું છે, આ સિવાય નવી પદ્ધતિઓ અપનાવવામાં આવી રહી છે.

નવી જગ્યાએ તેલ શોધવાના પ્રયાસો

રાજ્યમંત્રીએ કહ્યું કે દેશમાં નવા સ્થળો શોધવાના પ્રયાસો કરવામાં આવી રહ્યા છે. મણિપુર, મિઝોરમ, અરુણાચલ પ્રદેશ નાના રાજ્યો છે પણ ત્યાં પણ તેલની શોધ થશે. આ અગાઉ પેટ્રોલિયમ રાજ્ય મંત્રીએ કાર્યક્રમમાં મેધાવી વિદ્યાર્થીઓને મોબાઈલ ફોનનું વિતરણ કર્યું હતું.