ગજબ! 35 ફૂટના રૂમમાં ચાલતી હતી ઓફિસ, 10 કરોડ રોકડા મળ્યા, ટર્નઓવર જોઈને GST વિભાગના ઉડી ગયા હોશ
મહારાષ્ટ્રના GST વિભાગે બુલિયન કંપનીની ખૂબ જ નાની ઓફિસ પર દરોડા પાડ્યા, જ્યાંથી લગભગ 10 કરોડ રૂપિયાની રોકડ મળી આવી. તેનાથી પણ ચોંકાવનારી વાત એ છે કે માત્ર 35 ફૂટના રૂમમાં ઓફિસ ચલાવતી કંપનીનું ટર્નઓવર 1,764 કરોડ રૂપિયા છે.
બાતમીના આધારે, વિભાગે 16 એપ્રિલે દક્ષિણ મુંબઈમાં ઝવેરી બજાર અને અન્ય સ્થળોએ સ્થિત ચામુંડા બુલિયનના પરિસરમાં દરોડા પાડ્યા હતા. આ એવી જગ્યાઓ હતી જેનો જીએસટી વિભાગના રજીસ્ટ્રેશનમાં ઉલ્લેખ નથી. ત્યારબાદ વિભાગે 20 એપ્રિલના રોજ સમાન ગુપ્ત કમ્પાઉન્ડ પર દરોડા પાડ્યા હતા, જ્યાંથી 9.78 કરોડ રોકડ અને 13 લાખની કિંમતની 19 કિલો ચાંદીની ઇંટો મળી આવી હતી. આ બધા પૈસા અને ચાંદી એક નાનકડા રૂમની દિવાલો અને ફ્લોર નીચે સંતાડીને રાખવામાં આવ્યા હતા.
જ્યારે GST વિભાગે એનાલિટિક ટૂલ દ્વારા બુલિયન કંપનીના ખાતાની તપાસ કરી ત્યારે જાણવા મળ્યું કે 2019-20માં કંપનીનું ટર્નઓવર રૂ. 22.83 લાખ હતું પરંતુ તે 2020-21માં ઝડપથી વધીને 652 કરોડ થઈ ગયું હતું અને ગયા નાણાકીય વર્ષ દરમિયાન પણ ઘણા વધુને રૂ. 1,764 કરોડ થઇ ગયા. તે નાની ઓફિસના માલિકો અને તેમના પરિવારોએ આ ખજાનાની જાણકારી હોવાનો ઇનકાર કર્યો છે. ધરપકડના ડરથી ઓફિસના માલિકે આગોતરા જામીન માટે મુંબઈ સેશન્સ કોર્ટમાં અરજી કરી છે. જીએસટી વિભાગે આ વર્ષે પાંચ મોટી ધરપકડો કરી છે. જીએસટી વિભાગે ઓફિસને સીલ કરી દીધી છે અને વધુ તપાસ કરવા આવકવેરા વિભાગને જાણ કરી છે. માત્ર આવકવેરા વિભાગ જ રિકવર કરાયેલી રોકડના સ્ત્રોતની ખાતરી કરશે. સમગ્ર કાર્યવાહી જીએસટી વિભાગ દ્વારા જોઈન્ટ કમિશનર ઓફ સ્ટેટ ટેક્સ, રાહુલ દ્વિવેદી અને અન્ય વરિષ્ઠ અધિકારીઓ વિનોદ દેસાઈની દેખરેખ હેઠળ કરવામાં આવી હતી.