શિવસેનાના ધારાસભ્યને ગુજરાત પોલીસે હોટલમાં માર માર્યો, નીતિન દેશમુખ શિંદે જૂથ છોડીને મુંબઈ જવા માંગતો હતો, તેને એરલિફ્ટ કરીને ધરાર ગુવાહાટી લઈ ગયા

મહારાષ્ટ્રમાં રાજકીય ઉથલપાથલ વચ્ચે શિવસેનાએ મોટો દાવો કર્યો છે. શિવસેનાએ કહ્યું છે કે એકનાથ શિંદેના કેમ્પમાં રહેલા અકોલાના ધારાસભ્ય નીતિન દેશમુખને ગુજરાત પોલીસે સુરતની એક હોટલમાં માર માર્યો હતો. તેઓ મુંબઈ આવવા માંગતા હતા, પરંતુ તેમને બંધક બનાવીને ગુવાહાટી લઈ જવામાં આવ્યા હતા.

સુરતના સ્થાનિક શિવસેના નેતા પરેશ ખેરે જણાવ્યું હતું કે નીતિન દેશમુખ હોટલમાંથી બહાર આવ્યા અને ચોકડી પર આવ્યા, જ્યાં તેમણે મુંબઈ જવા માટે અમારી પાસે મદદ માંગી. અમે ચોકડી પર પહોંચ્યા ત્યાં સુધીમાં પોલીસ તેમને પકડીને હોટેલમાં લઈ જતી હતી. અમે પણ તેની પાછળ ગયા, પરંતુ અમને હોટલના બાર પાસે રોકી દેવામાં આવ્યા.

શિવસેનાએ દાવો કર્યો છે કે જ્યારે નીતિન મુંબઈ જવાને લઈને હોટલમાં હંગામો મચાવી રહ્યા હતા, ત્યારે પોલીસ અધિકારીઓએ તેને માર માર્યો હતો. બીજી તરફ માહિતી મુજબ હોટલમાં હંગામા દરમિયાન સ્થાનિક પોલીસ અધિકારી અને ધારાસભ્ય વચ્ચે ઝપાઝપી થઈ હતી, ત્યારબાદ નીતિનને હોસ્પિટલમાં દાખલ કરવામાં આવ્યો હતો.

શિવસેનાના રાજ્યસભા સાંસદ સંજય રાઉતે કહ્યું છે કે નીતિન દેશમુખને સુરતની એક હોટલમાં હાર્ટ એટેક આવ્યો છે, પરંતુ ભાજપના લોકો તેમને બંધક બનાવી રહ્યા છે. રાઉતે વધુમાં કહ્યું- તેમના 9 ધારાસભ્યોનું અપહરણ કરવામાં આવ્યું છે. પોલીસ આ મામલે સંપૂર્ણ તપાસ કરશે. 9 ધારાસભ્યો મુંબઈ પાછા આવવા માગે છે, પરંતુ તેમને પાછા આવવા દેવાયા નથી.

અહીં મંગળવારે નીતિન દેશમુખની પત્ની પ્રાંજલિએ અકોલા પોલીસ સ્ટેશનમાં ગુમ થયાની ફરિયાદ નોંધાવી છે. પ્રાંજલિએ ફરિયાદમાં કહ્યું- તેનો પતિ મંગળવારે સવાર સુધી અકોલા સ્થિત તેના ઘરે આવવાનો હતો, પરંતુ સોમવાર સાંજથી તેનો ફોન રિસીવ નથી થઈ રહ્યો. મારા પતિ ગુમ થઈ ગયા છે અને તેમનો જીવ જોખમમાં છે.