હાર્દિક પંડ્યા હજુ સુધી એક પણ IPL ફાઈનલ હાર્યો નથી, શું ગુજરાત ટાઇટન્સનો તાજ મળશે?
ઈન્ડિયન પ્રીમિયર લીગ-2022ની ફાઈનલ રવિવારે ગુજરાત ટાઈટન્સ અને રાજસ્થાન રોયલ્સ વચ્ચે રમાવાની છે. બંને ટીમોએ આ સિઝનમાં જબરદસ્ત રમત બતાવી છે અને હવે તેઓ ખિતાબ જીતવાની નજીક છે. છેલ્લી મેચમાં નસીબ કોનો સાથ આપે છે, તેના પર સૌની નજર રહેશે. પરંતુ જો આપણે ગુજરાત ટાઇટન્સના કેપ્ટન હાર્દિક પંડ્યાના રેકોર્ડ પર નજર કરીએ તો તે હંમેશા IPL ફાઇનલમાં જીતતો રહ્યો છે.
હાર્દિક પંડ્યા આ વખતે IPLમાં કેપ્ટન તરીકે રમી રહ્યો છે અને તેના નેતૃત્વમાં ગુજરાત ટાઇટન્સ પોતાની ડેબ્યૂ સિઝનમાં જ ફાઇનલમાં પહોંચી હતી. જોકે, હાર્દિક પંડ્યા માટે આ પહેલી IPL ફાઈનલ નહીં હોય. આ પહેલા તે ચાર આઈપીએલ ફાઈનલ રમી ચુક્યો છે અને અદ્ભુત વાત એ છે કે ચારેયમાં તેણે જીત મેળવી છે.
હાર્દિક પંડ્યા ગુજરાત ટાઇટન્સ પહેલા મુંબઈ ઈન્ડિયન્સ સાથે હતો, જ્યાં તેણે ચારેય ટાઇટલ જીત્યા છે. હાર્દિક પંડ્યાએ 2015માં ઈન્ડિયન પ્રીમિયર લીગમાં ડેબ્યૂ કર્યું હતું, ત્યારબાદ તે મુંબઈ સાથે જ રહ્યો હતો. હાર્દિક પંડ્યાએ મુંબઈ ઈન્ડિયન્સ સાથે 2015, 2017, 2019, 2020માં IPL ટ્રોફી જીતી હતી.
હવે હાર્દિક પંડ્યા એક ટીમનો કેપ્ટન છે અને તેના નેતૃત્વમાં ટીમ ફાઇનલમાં પહોંચી છે. આવી સ્થિતિમાં તે ઈતિહાસ રચવા અને પોતાની ટીમ માટે ખિતાબ જીતવાની સાથે સાથે આઈપીએલ ફાઈનલ જીતવાનો રેકોર્ડ જાળવી રાખવાનો પ્રયાસ કરશે.
જો બેટ્સમેન તરીકે હાર્દિક પંડ્યાની આ સિઝનની વાત કરીએ તો તે જબરદસ્ત ફોર્મમાં છે. બેટ્સમેન તરીકે હાર્દિક માટે આ સિઝન શ્રેષ્ઠ સાબિત થઈ છે. તેણે અત્યાર સુધી 14 મેચમાં 453 રન બનાવ્યા છે, જેમાં તેની એવરેજ 45થી વધુ રહી છે. આ સિઝનમાં હાર્દિક પંડ્યાએ 4 અડધી સદી ફટકારી છે.